唔係呀，其實呢

每個人身邊都有咁既人，或者，再老套啲講，好似便利店咁總有一間係左近。

傾計既時候，佢插嘴最鍾意講：「唔係呀，其實呢……」就同考English oral一樣，一開口就I agree with you，然後講自己野，但係「唔係呀」仲衰啲，了無原因地反對，跟手就拋一大堆自己想講既野出黎，聽嗰個都唔知究竟「唔係呀」啲乜？

我想話我講緊野你打斷我，仲要話「唔係呀」，唔咩係呀？我講尖沙咀個間餐廳好食過銅鑼灣個間又話「唔係呀」，我講最近想睇個套戲你又「唔係呀」，我講我對時事問題既立場你都「唔係呀」我，姑勿論我既口味、品味同埋政治立場係咪要你認同，而家香港係咪連言論自由都冇埋？我都未講完……

此話一出，對方立即九秒九回應：「你聽我講埋先……」然後繼續口若懸河，講野好似要去快餐店講急口令贏漢堡包咁快。（你知我講咩既）

唔知邊句開始，我開始四圍望，自動mute左佢，望到你個樣，聽唔到你把聲。你係咪要搞到咁先安樂？

之後又捉住我：「喂，你究竟有冇聽我講野架？」

下，唔洗講到咁明啦，你句句都「唔係呀」，「其實呢」我真係同你傾唔到落去（攤手）。